Ангелов Творец и всея твари содетель, явивый тя Церкви Своей веры поборника, и за веру непобедимаго страстотерпца, внушает нам, за подвиги страданий твоих восхваляти тя, святе Георгие, сице:
Радуйся, до конца Иисуса Сына Божия возлюбивый;
радуйся, за имя Его с любовию душу свою положивый.
Радуйся, исповедниче от Бога призванный;
радуйся, подвижниче Божиею благодатию прославленный.
Радуйся, ангелов сожителю; радуйся, пророков равностоятелю.
Радуйся, Георгие, великий победоносче.